Gjatë fundjavës, në media qarkulloi një foto ku tregohej se ishte vendosur flamuri serb midis dy flamujve shqiptar në kullën e vrojtimit në Koshare, shkruan OnAir.
Për këtë ngjarje zëdhënësi i policisë, Daut Hoxhaj u shpreh se njësia kufitare ka patrulluar zonën dhe ka dalë në përfundimin se ky lajm nuk është i vërtetë.
Ndërkohë njëri nga banorët e zonës shprehet se ka shumë mundësi që ky lajm që ka qarkulluar në media të jetë i vërtetë. Kjo pasi ky objekt ka pasur shumë vizitorë gjatë fundjavës. Sipas tij duhen marrë masa që një ngjarje e tillë të mos përsëritet.
Kujtojmë se beteja e Kosharës zgjati nga 9 Prill deri më 10 Qershor 1999 dhe ishte një nga betejat më të ashpra të luftëtarëve të UÇK kundra forcave serbe. Triumfimi i palës shqiptare bëri që të rrëzohej kufiri thuajse 100 vjeçar me Shqipërinë.