Pritje të gjata për mërgimtarët ka edhe në Komunën e Malishevës, e kësaj here për pasaportat apo letërnjoftimet e tyre.
Që nga ora 1 pas mesnate, mërgimtari Ismet Paçarizi nga Malisheva po pret për t’u futur në radhë për pasaportë, edhe pse dëshira e tij është që kohën ta kalojë pranë familjes.
“E pashë një ditë që qytetarët edhe filluan të rrahen mes vete. Nuk kanë faj se ndoshta janë lodhë, por për të mos u konfliktuar mërgimtarët duhet kryer punët më shpejt. Këtu është vetëm një sportel, për t’u evituar ky problem të hapen edhe 3-4 sportele tjera”, thotë mërgimtari tjetër Nazmi Hoti, përcjell Telegrafi.
E një mërgimtarit tjetër, më së shumti i dhimbsen fëmijët nga kjo pritje e gjatë.
“Ka pasur mërgimtarë edhe me fëmijë. Të rriturit edhe mund të qëndrojnë por fëmijët nuk mund të qëndrojnë. Kam dy javë për pasaportë, duhet pritur radhën, ndoshta kalon afati për me shkua, por duhet pritur”, shprehet Haki Begaj.
Sidoqoftë, mërgimtarët thanë se asnjëherë më parë nuk kanë rastisur në pritje më të gjatë se këtë vit.
